समाचार: पर्वतमा बन्दै एसियाकै लामो झोलुङ्गे पुल

पर्वत : लामा र अग्ला झोलुंगे पुलहरूको जिल्लाको रूपमा परिचित पर्वत जिल्लामा अब फेरि दक्षिण एसियाकै लामो झोलुंगे पुल निर्माणको काम शुरु हुने भएको छ।

जिल्लाको कुश्मा नगरपालिका १ पाङको अदुवाबारीबाट बागलुङको बागलुङ नगरपालिका १ रामरेखा जोड्ने गरी ५ सय ६७ मिटर लामो पुल निर्माणको काम शुरु हुन लागेको हो। कालीगण्डकी नदीमाथि निर्माण गर्न लागिएको उक्त पुलको उचाइ १ सय २२ मिटर रहने छ। पुल निर्माणका लागि हिमशिखर कन्स्ट्रक्सनले ६ करोड ९१ लाख रुपैयाँमा ठेक्का सम्झौता गरेको छ।